Водечкиот руски опозициски лидер Алексеј Навални беше однесен во област на околу 200 километри источно од Москва, каде ќе издржи казна од две и пол години во една од казнените колонии.
Локацијата на Навални, најпознатиот противник на рускиот претседател Владимир Путин, не е позната од четвртокот, кога тој беше однесен од московскиот затвор каде што беше од апсењето на 17 јануари.
Затворската служба сè уште нема објавено информации каде се наоѓа сега.
Властите денес изјавија дека Навални ќе биде во карантин за некое време за прв пат и дека потоа ќе биде префрлен во една од казнените колонии во регионот Владимир, пренесе Франс прес.
Агенциите ТАСС и РИА Новости објавија дека Навални ќе биде префрлен во „Казнената колонија број два“ во малото гратче Покров во регионот Владимир, во европскиот дел на Русија.
Руските медиуми наведуваат дека околу 800 затвореници ја издржуваат казната таму и дека во тој тип колонија се применуваат „вообичаени правила“, што значи дека условите во затворот се помалку строги.
Еден од блиските соработници на осудениот опозиционер, Леонид Волков, напиша на Твитер дека нема официјална потврда од затворската служба за судбината на Навални и дека неговите роднини и адвокати не биле информирани за ништо, што често се случува во Русија при пренесување на осуден во затвор.
Руските казнени колонии се продолжение на поранешните „гулаги“ во Советскиот Сојуз и се придружени со многу лоша репутација – од тврдења дека лошо се третираат затвореници, дека објектите се многу валкани, до широко распространета тортура.
Повеќето осуденици во Русија ги издржуваат своите казни во вакви логори, од кои некои се многу далеку од градовите и каде работата на затворениците е задолжителна, главно во работилници за шиење или за производство на мебел, додава Франс прес.
44-годишниот Навални беше уапсен на 17 јануари, веднаш по враќањето од Германија, каде се опоравуваше од труење пет месеци, за што го обвинува Кремљ.
Руските власти ги отфрлаат овие тврдења и го обвинуваат Навални за соработка со западните разузнавачки служби.
Во февруари, судот во Москва го осуди Навални на две и пол години затвор, менувајќи ја условната казна од декември 2014 година во затворска казна, бидејќи тој не се пријавил навреме до надлежниот орган додека се опоравуваше од труење во Германија.
Апсењето на Навални доведе до бран протести на десетици илјади луѓе низ Русија, во повеќе од 100 градови. Околу 11.000 лица беа уапсени на неовластените протести, од кои многумина беа казнети или со парични казни или затвор од седум до 15 дена.