Бустер дозата на вакцината против Ковид 19 им обезбедува на старите лица високо ниво на заштита од тешка форма на болеста предизвикана од сојот омикрон, така што нема потреба од четврта доза, соопштија британските здравствени власти.
Советници на британската влада препорачаа да не се дава четвртата доза вакцина против Ковид-19 на корисници на старечки домови и на лица постари од 80 години, бидејќи податоците покажуваат дека третата доза обезбедува трајна заштита од посериозни форми на болести кои бараат хоспитализација.
За лицата постари од 65 години, заштитата од одење во болници останува околу 90 отсто три месеци по примањето на третата доза, според податоците собрани од Британската агенција за здравствена безбедност.
Како резултат на тоа, Заедничкиот комитет за вакцинација и имунизација ја советуваше владата дека во моментов нема потреба да се нуди четврта доза, или втора засилена доза, на ранливото население. Наместо тоа, владата треба да се фокусира на добивање трета доза што е можно повеќе луѓе за да ја зајакне заштитата од високо преносливиот сој Омикрон, советува Комитетот.
„Сегашните податоци покажуваат дека бустер дозите продолжуваат да обезбедуваат високо ниво на заштита од тешки болести, дури и за најранливите постари возрасни групи“, рече професорот Веи Шен Лим, претседател на комитетот. Тој додаде дека поради тоа комисијата заклучила дека нема итна потреба од воведување втора бустер доза, но рече дека таа ќе продолжи да се следи и разгледува.
Омикрон сојот на коронавирусот предизвика голем скок на инфекции и приеми во болница.