Нема преживеани во авионската несреќа што се случи во западниот дел на Непал.
Во моментот на несреќата во авионот на непалската компанија „Јети ерлајнс“ имало 72 лица, од кои 10 странски државјани.
Локалните медиуми јавуваат дека авионот се урнал додека се обидувал да слета на меѓународниот аеродром Похара.
Причината за несреќата се утврдува.
Најсмртоносната несреќа во Непал од 2018 година
Станува збор најсмртоносната несреќа во Непал од март 2018 година, кога патничкиот авион на компанијата „US-Bangla“, кој летал од Дака, се урнал при слетувањето во Катманду, при што загинале 51 од вкупно 71 лице во него, според Мрежата за воздухопловна безбедност.
Авионот АТР 72 на „Јети ерлајнс“ на летот од Катманду превезувал 72 лица, меѓу кои две деца и четворица членови на екипажот, изјави портпаролот на авиокомпанијата Сударшан Бартаула.
-Во авионот се наоѓале пет индиски, четворица руски, еден ирски, двајца јужнокорејски, еден австралиски, еден француски и еден аргентински државјанин, изјавил претставник на аеродромот во Непал.
Moments of Nepal air crash #pokhra #NepalPlaneCrash read full story here https://t.co/0c3547Tyok pic.twitter.com/DFcdX6Zvmd
— India Blooms (@indiablooms) January 15, 2023
Авионските несреќи не се непознати во Непал
Авионот бил стар 15 години, според веб-страницата за следење летови „FlightRadar24“.
АТР 72 е авион со широка употреба, заеднички произведен од француската компанија Ербас и италијанската компанија Леонардо. „Јети ерлајнс“ поседува вкупно 6 авиони ATR72-500, според податоците на нивната веб-страница.
Авионските несреќи не се невообичаени во Непал, кој е дом на осум од 14-те највисоки планини во светот, вклучувајќи го Еверест, каде што времето може нагло да се промени и да создаде опасни услови.
Непалскиот премиер Пушпа Камал Дахал свика итен состанок на владата по несреќата, се вели во владиното соопштение.