Израелскиот премиер Бенјамин Нетанјаху вети дека Израел ќе „застане сам“ ако треба, отфрлајќи ги коментарите на американскиот претседател Џо Бајден дека нема да испорача офанзивно оружје што Израел би можел да го користи за да изврши сеопфатен напад врз јужниот град Рафа.
„Ако треба да стоиме сами, ќе застанеме сами. Веќе реков дека ако треба ќе се бориме гребејќи со нокти“, се вели во изјавата на Нетанајаху.
Претходно, екстремно десничарскиот министер за национална безбедност на Израел, Итамар Бен-Гвир, напиша објава на платформата „Х“ со срце меѓу зборовите „Хамас“ и „Бајден“.
Тој и другите ултра-националистички членови на коалицијата на Нетанјаху ја поддржуваат големата операција Рафа и се заканија дека ќе ја урнат неговата влада доколку тоа не се случи.
Бајден минатата недела ја запре пратката со големи бомби до Израел поради загриженоста дека оружјето е од типот што предизвика значителни цивилни жртви во Газа и речиси сигурно ќе направи повеќе штета доколку Израел спроведе голема офанзива во овој дел од малата енклава каде се засолнети најголем дел од цивилното население во земјата.
Хуманитарните работници стравуваат од уште пострашна ситуација доколку Израел ја изврши долго ветената инвазија на јужниот град, кој е главната точка за дистрибуција на помош и каде околу 1,3 милиони Палестинци побараа засолниште, од кои повеќето избегаа од борбите на друго место.
Израел во вторникот ја зазеде страната на Газа од преминот Рафа со Египет, и не е јасно кога тој повторно ќе биде отворен.
Ограничениот воен упад на Израел во Рафа веќе ги искомплицира неколкумесечните напори на САД, Катар и Египет да посредуваат за прекин на огнот и ослободување на заложниците заробени во нападот на Хамас на 7 октомври што беше причина за избувнување на војната.