Министерот за надворешни работи, Бујар Османи, синоќа изјави дека Македонија го поддржува дијалогот меѓу Белград и Приштина и смета дека решението „треба да заврши со заемно признавање“.
Османи го рече тоа во интервју за емисијата „Топ тема“, но избегна да одговори директно на прашањето дали нашиот став е дека какви било идеи што содржат размена на територии се неприфатливи, без оглед дали се однесуваат на косовското прашање или проблемите во Босна.
„Ние веруваме дека решението со границите на Балканот е токму преку релативизација на истите, а релативизацијата е преку интеграција на регионот“, изјавил Османи.
Повторно запрашан, Османи продолжил дека „единствената алтернатива за траен мир и стабилност во регионот е проширувањето на НАТО во регионот, покрај членството на целиот регион во ЕУ“ и дека „сите други модели можат да бидат предизвик за мирот“.
„Секоја иницијатива, секоја идеја што може да предизвика мир во регионот е прифатлива. Сепак, ние не сакаме да бидеме дел од дебати чии автори не ги познаваме, чија цел на иницијација не ја знаеме, бидејќи можеме многу лесно да паднеме во невнимателни стапици, како во врска со неофицијалниот документ од Словенија“, одговорил министерот на прашањето за словенечкиот „нон-пејпер“.
Османи повтори дека „сè уште има недовршени прашања на Балканот“ и дека „едно од нив е дијалогот, односот меѓу Белград и Приштина“.
„Ние го поддржуваме овој дијалог. Веруваме дека решението треба да заврши со заемно признавање на двете земји и продолжување на европската интеграција на сите шест земји од Западен Балкан во ЕУ. Сепак, конечната одлука ќе ја донесат властите во Косово и Србија. За нас е важно секоја одлука да не влијае на соседните земји и регионот“, изјавил Османи.