Осум лица биле убиени денеска во вооружен напад на железничко депо во Сан Хозе, во американската држава Калифорнија, соопштија официјалните лица, наведувајќи дека и осомничениот напаѓач е мртов.
Нападот се случил околу 6,30 часот наутро во депото во Сан Хозе, во чија близина се наоѓаат полициската администрација на округот и автопатот што води кон аеродромот.
Портпарол на шерифот во областа Санта Клара, Расел Дејвис, изјави дека осомничениот напаѓач е вработен во компанијата ВТА, која обезбедува превоз со автобус и железница низ тој округ.
Шерифот на округот Лори Смит изјави дека „не е утврдено“ како е убиен напаѓачот.
Дејвис рече дека не знае дали вооружениот напад се случил внатре или надвор и дека меѓу жртвите има и вработени во ВТА.
Градоначалникот на Сан Хозе, Сем Ликардо изрази жалење на прес-конференцијата поради „ужасниот ден“ за тој град. Гувернерот на Калифорнија, Гевин Њусам, преку Твитер се огласи и напиша дека неговата канцеларија е во постојан контакт со локалната полиција и ја следи ситуацијата.