Тонино Пицула, хрватски европратеник и известувач за Србија во Европскиот парламент, во интервју за Хрватското радио ја критикуваше политиката на „стабилократија“ кон Западен Балкан, нагласувајќи дека ЕУ честопати дава приоритет на стабилноста пред зајакнувањето на демократските институции.
„Европската унија беше многу широко распространета и многу дарежлива кон земјите од Западен Балкан, особено кон Србија, насочувајќи огромни суми средства (…), но ние одвоивме многу малку средства за зајакнување на демократските институции“, рече Пицула, додавајќи дека креаторите на таквите политики често ги нарекува „свештенство на стабилократијата“.
Пицула, европратеник на СДП во Европскиот парламент, ја опиша стабилократијата како пристап на ЕУ кој и дава приоритет на регионалната стабилност преку дарежлива финансиска поддршка, додека зајакнувањето на демократските институции беше помалку во фокусот.
Тој ги критикуваше политиките засновани на верувањето, слично на она што Ангела Меркел го примени за Русија, дека трговијата и размената сами по себе ќе доведат до демократизација.
„Знаеме како заврши со Русија, а нешто слично се случи и на Западен Балкан“, додаде хрватскиот европратеник, нагласувајќи дека таквата политика „треба да престане“ и да се воведе построга условеност.
Мора да имате соговорници кои ќе ја почитуваат ЕУ како заедница на вредности, а не само како банкомат“, заклучува Пицула.
По тридневната посета на Србија, каде што како известувач на Европскиот парламент за Србија разговараше со претставници на власта, опозицијата, медиумите, невладините организации, деловниот живот и тинк-тенковите, Пицула посочи дека никој нема јасен одговор на прашањето како да се реши актуелната криза во Србија.