Во очекување на евентуално нови рестриктивни мерки, граѓаните го искористија можеби последниот викенд без маски на отворено.
Членовите на Комисијата за заразни болести утрово се на состанок во Владата и разговараат за новите мерки, кои Комисијата ги предложи во петокот.
Комисијата за заразни болести, како што во петокот на Фејсбук најави министерот за здравство Венко Филипче, денеска би можело доколку е потребно, да и предложи на Владата дополнителен пакет мерки. Меѓу другото, можно е да биде предложено „целосна забрана за сите настани“ и „крај на работното време на сите економски оператори во 23 часот“ „Преполовување на капацитетите во јавниот превоз“, напиша Филипче.
Предлог-мерките за заштита од Ковид-19, како што е задолжително носење маски на отворено, забрането групирање по 22 часот на јавни места за повеќе од четворица и забрана за поголеми семејни собири се веќе доставени во Собранието.
Според извештајот на Министерството за здравство, вкупната бројка на ковид дијагностицирани во нашата земја од почетокот на епидемијата изнесува 23628, а оздравени се вкупно 17239 пациенти. Починати се 834 лица, а во моментов бројот на активни случаи во земјата изнесува 5555.