Американскиот државен секретар Мајк Помпео следната недела ќе ја посети С. Македонија. Тоа е прва официјална посета на американски политичар од тој ранг од 2001 година
Највисокиот американски дипломат Мајк Помпео доаѓа во С. Македонија следната недела на разговори со македонскиот државен врв.
Американскиот Стејт Департмент потврди дека Помпео доаѓа на турнеја низ повеќе европски држави.
Неговата рута започнува во Рим на 1 октомври, каде најпрво оди на аудиенција кај Папата Франциско, а потоа се среќава со италијанскиот државен врв.
Оттаму, Помпео продолжува за Црна Гора, а следната станица му е Македонија
Стејт Департментот не наведува точен датум, од распоредот може да се заклучи дека Помпео пристигнува во Охрид каде по политичкиот дел и средбите со претседателот Стево Пендаровски и премиерот Зоран Заев, ќе посети некои од манастирските комплекси
Од Охрид, Помпео продолжува за Атина на средби со грчкиот државен врв.
Колин Пауел е првиот и последен американски државен секретар кој досега ја посетил Македонија.
Пауел дојде во Скопје на 13 април 2001 година во екот на воената и политичка криза во земјата. Две години пред него, во јуни 1999 година, за време на косовската криза, во земјата краток престој имаше и американскиот претседател Бил Клинтон.