Албанскиот премиер Еди Рама зазеде став со кој де факто ја поддржува актуелната влада на ВМРО-ДПМНЕ кога станува збор за прашањето на Бугарите во Македонија, гледано низ призмата на членството на земјата во ЕУ. Засега, европскиот пат на Македонија е на чекање, бидејќи земјава сè уште одбива официјално да ги внесе Бугарите во македонскиот устав.
Рама зборуваше на конференцијата „Албанија: Нови хоризонти“ што се одржа во Виена, Австрија, посветена на промоција на Албанија како преферирана дестинација за стратешки инвестиции во сектори како што се енергетиката, инфраструктурата, туризмот и технологијата, а воедно промовираше долгорочни партнерства за одржлив развој на земјата.
Неговиот целосен говор е достапен на официјалната веб-страница на албанската влада.
„Се надевам дека Бугарија ќе биде пофлексибилна со Северна Македонија за да им дозволи да преговараат, бидејќи има нешто многу лошо, многу лоша навика во Европската Унија да зема заложници. Ова е земање заложници, а не киднапирање, за внатрешна политика. За внатрешна политика, една земја зема друга земја како заложник и ја претвора во чинија за јавното мислење, знаете, во кујната.
Се надевам дека Северна Македонија ќе има нормален пат барем за преговорите, бидејќи за мене нема смисла земја од ЕУ да ги блокира преговорите со земја што сака да се приклучи на ЕУ, од некои билатерални причини, што може да биде многу легитимно, но тоа не е причината зошто ги блокирате преговорите. Ги оставате преговорите да продолжат и кога одлуката за членство ќе дојде во последен момент, можете да кажете не, има нешто што треба да се одлучи. Но, ова е многу политичко, многу лицемерно, лудост“, изјави Рама.