Ширум светот денеска се одбележува Денот на слободата на медиумите.
Во извештај на „Репортери без граници“ објавено е дека слободата на медиумите во светот „никогаш не била толку многу загрозена“.
Генералниот секретар на ОН Антонио Гутереш повика на заштита на слободата на медиумите, наведувајќи дека е потребна „заедничка борба за нашето право на вистина“.
– Слободата на медиумите го унапредува мирот и правдата за сите нас. Слободата на медиумите е клучна во борбата против дезинформациите. Потребна е заедничка борба за нашето право на вистина, нагласи Гутереш.
– Кога ќе ги заштитиме новинарите, нивните зборови и фотографии ќе може да го променат нашиот свет, вели Гутереш.
Во извештајот на истражувачкиот центар на Европскиот парламент се наведува дека „слободата на медиумите во земјите од Западен Балкан не е целосна бидејќи државите во тој регион се соочени со политизација, проблеми во спроведување на законите и заплашување новинари, со пораст на автоцензура“.
Во документот се наведува дека автоцензурата е предизвикана како со суптилни, така и со отворени влијанија, дека квалитетното новинарство е отежнато и дека се фаворизира „таблоидизација“.
Заплашувањето новинари е оценето како распространето, а се укажува и на проблеми со неказнивост на напади врз новинари.
ЕП потсетува дека слободата на медиумите е основна вредност на ЕУ и темел на демократијата и претставува приоритет за проширување.
Според ЕУ, државите кандидати и понатаму се соочуваат со „системски недостатоци кои бараат долгорочни и континуирани напори“ кои во изминатите години се во застој, што предизвика ситуација во која „нема напредок“.
Во извештајот пишува и дека недостигот од транспарентност и сопствеништво над медиуми, како извори на финансирање, и понатаму претставуваат проблем.
Истражувачкиот центар на ЕП наведува дека во Србија е нејасна сопственичката структура на медиумите и државното финансирање особено на локално ниво, дека во БиХ најголем број медиуми не откриваат информации за своите финансии и вистинска сопственост, а во Македонија дел од телевизиите се во сопственост на поединци кои се наводно поврзани со владата.
УНЕСКО денеска и утре ќе организира Меѓународна конференција по повод Светскиот ден на слободата на медиумите во Џакарта, со цел да укаже на улогата на медиумите во унапредување на мирното, праведно и инклузивно општество.
Светскиот ден на слободата на медиумите се одбележува од 3 мај 1993 година кога е утврден од генералното собрание на ОН.