Македонскиот дефанзивец Стефан Ристовски со грешка во првото полувреме им даде „крилја“ на Португалците на патот кон пласман на Светското првенство.
Домашниот тим победи со 2-0 на стадионот „Драгао“ во Порто, но играчот на Динамо Загреб не е незадоволен.
„Сакам да ѝ честитам на цела Португалија. Беше отворен натпревар, противникот доминираше. И покрај поразот мораме да си заминеме со кренати глави. Имавме патување во кое никој не веруваше и тоа е нашата најголема гордост“, изјави синоќа Ристовски, кој од 2017 до 2021 година го носеше дресот на Спортинг од Лисабон.
„Секако дека ќе навивам за Португалија на Мундијалот и се чувствувам малку Португалец. Мојот син е роден овде, имам португалски пасош и би сакал да ја видам Португалија како го крева трофејот на Светското првенство“, рече Ристовски на прес-конференцијата после синоќешната средба.
Искусниот фудбалер се осврна на грешката која придонесе за првиот гол на Бруно Фернандеш и поразот на Македонија.
„Кога играш против толку големи тимови, не смеете да грешите. Не можете да погрешите со играчи како Бруно и Роналдо. Сепак, тоа се случи и Португалија го искористи тоа“, дециден е Ристовски.