Државниот секретар на САД, Марко Рубио, на средбата со македонскиот министер за надворешни работи и надворешна трговија, Тимчо Муцунски, ја потенцираше важноста сите членки на НАТО да го зголемат буџетот за одбрана и да стигнат до пет проценти од БДП.
Во разговорот, Рубио и Муцунски ја потврдија силната соработка меѓу САД и Северна Македонија, нагласувајќи заеднички интереси во стабилноста на регионот, економската соработка и развојот на НАТО. Двете страни разговараа за можностите за проширување на трговските односи и инвестициската соработка, вклучувајќи и разговори за потенцијален договор за слободна трговија.
Министерот Муцунски изрази посветеност на македонската влада кон продлабочување на политичкиот дијалог со САД и кон унапредување на стратешкото партнерство преку спроведување на заеднички акционен план. Тој исто така потенцираше дека Северна Македонија продолжува да вложува повеќе од два проценти од БДП во одбраната, како кредибилен член на НАТО.
На крајот, двајцата соговорници истакнаа важноста на унапредување на економската соработка, привлекување американски инвестиции и зголемување на присуството на американски компании во земјата.