Русија денеска објави дека побарала итна седница на Советот за безбедност на ОН на која ќе се разговара за воените напади на САД и Велика Британија врз цели на Хутите во Јемен.
Средбата треба да се одржи во петок по состанокот за решение за блискоисточната криза.
Да потсетиме, американската војска и нејзините сојузници извршија напади врз повеќе од 60 цели на 16 локации што ги користат бунтовниците Хути во Јемен, потврдија денеска американските воздухопловни сили.
Целите вклучуваат командни и контролни центри, складишта за муниција, системи за лансирање, производствени капацитети и противвоздушни радарски системи, се вели во соопштението на американското воено воздухопловство.
Во нападите се користени повеќе од 100 прецизно наведувани проектили, јавува Би-Би-Си.
„Остануваме посветени на нашите клучни партнери на Блискиот Исток во одбраната од милитантните групи поддржани од Иран, вклучително и екстремистите Хути и заканата што тие ја претставуваат за регионалната безбедност и стабилност“, изјави командантот на американските воздухопловни сили Алекс Гринкевич.