Американскиот секретар за одбрана Лојд Остин во понеделникот ја остави отворена можноста за нови напади врз групи поврзани со Иран, доколку не престанат нападите врз американските сили во Ирак и Сирија, што се случи само неколку часа по американските воздушни напади во текот на ноќта во Сирија, пренесува „Ројтерс“.
Американската војска го изврши својот трет воздушен напад во исто толку недели во Сирија доцна во неделата, чија цел беше објект за обука во близина на градот Албу Камал и безбедна куќа во близина на градот Мајадин.
Нападите уследија по најмалку 40 напади на силите поддржани од Иран во последните недели против американските и коалициските трупи во Ирак и Сирија, додека регионалните тензии се зголемуваат поради војната меѓу Израел и Хамас. Најмалку 45 американски војници претрпеле трауматски повреди на мозокот или полесни повреди.
„Овие напади мора да престанат, а ако не, тогаш нема да се двоумиме да го направиме она што е неопходно за повторно да ги заштитиме војниците“, им рече Остин на новинарите на прес-конференција во Сеул.
Остин додаде дека последните воздушни напади во источна Сирија биле насочени кон објекти користени од Корпусот на иранската револуционерна гарда и сродните групи.
„Овие удари имаат за цел да ја нарушат и деградираат слободата на дејствување на овие групи, кои се директно одговорни за нападите врз американските сили во Ирак и Сирија“, подвлече Остин.