САД: Предлог-буџетот за 2022 година, предвидува сума од 106,2 милиони долари за С. Македонија и другите земји од Западен Балкан

од Nikola Popovski

Предлогот за буџет на американскиот Стејт департмент за 2022 година предвидува сума од 106,2 милиони долари како помош за земјите од Западен Балкан.

Како што е прецизирано, во Косово, Босна и Херцеговина, Србија, Северна Македонија, Албанија и Црна Гора, парите се наменети за поддршка на реформите во процесот на пристапување кон Европската унија и за спротивставување на руското влијание и дезинформации, пренесува Гласот на Америка.

Објаснувањето на буџетскиот предлог за Стејт департментот и УСАИД, вкупно 58,5 милијарди долари, што е доставено до Конгресот, укажува на поддршка за зајакнување на владеењето на правото, борба против корупцијата, зајакнување на граѓанското општество и обезбедување независен медиумски сектор.

„Програмата ќе ги вклучи и овласти локалните власти и помладата генерација да го забрзаат економскиот раст, да го запрат одливот на мозоци и да промовираат помирување меѓу различните етнички групи. Финансирањето ќе го промовира економскиот раст предводен од приватниот сектор и енергетската безбедност, вклучувајќи обновлива енергија, сајбер безбедност, здраво финансиско и регулаторно опкружување потребно за инвестирање и спроведување на обврските согласно договорот од Вашингтон во 2020 година, како и други договори за нормализација помеѓу Косово и Србија. Инвестициите, исто така, ќе го охрабрат економското закрепнување по пандемијата со Ковид -19“, се наведува во документот.

Слични содржини