Поранешниот американски претседателски кандидат и сенатор Берни Сандерс ја повика администрацијата на Вашингтон да направи се што е можно за да се реши украинската криза на дипломатски начин под услови кои би биле прифатливи за Русија и дека овој пристап не треба да се смета за знак на слабост или „смиреност“.
Тој како една од причините за кризата го наведе проширувањето на соработката на Украина со Соединетите Американски Држави и Западна Европа на полето на безбедноста, што вклучува потенцијално членство на државите од поранешниот Советски Сојуз во НАТО. Според него кризата со Украина може да се претвори во најлош вооружен конфликт од Втората светска војна.
„Колеги, никогаш не смееме да ги заборавиме ужасите во кои би можела да се претвори оваа војна во регионот и должни сме да направиме се што е во наша моќ за да постигнеме реално решение прифатливо за сите страни, и за Украина и за Русија“, но и за САД и Европа. „Мораме да ја спречиме најлошата европска војна од Втората светска војна“, рече Сандерс во обраќањето пред американскиот Конгрес.
Тој го повика американскиот естаблишмент да ги земе предвид ставовите на американските противници, иако, како што тврди, тоа не е многу популарно и „политички коректно“ во Вашингтон.
Без да го оспорува правото на државите на независна надворешна политика, Сандерс ги повика Украина и нејзините западни покровители да направат „мудар“ избор, да ги измерат сите позитивни и негативни последици од потенцијалната криза.
„Факт е дека проширувањето на соработката меѓу САД и Украина на полето на безбедноста веројатно би можело да има сериозни последици за двете страни“, додаде тој.
Тој како алтернатива ги наведе примерите на Финска, Шведска и Австрија, кои избраа да бидат воено неутрални и да не се приклучат на Алијансата, што сепак им овозможи да станат многу успешни демократии.
Сандерс, исто така, го нарече лицемерно тоа што САД не ги признаваат принципите на поделба на сфери на влијание, потсетувајќи на доктрината Монро, која имплицира дека целиот американски континент е „затворен за мешање од други држави“.
„Дали некој мисли дека Соединетите Американски Држави не би кажале ништо ако, на пример, Мексико или Куба, или која било земја во Централна и Латинска Америка, сака да формира воен сојуз со противникот на Америка? Дали мислите дека членовите на Конгресот би кажале дека Мексико е суверена земја и дека има право да прави што сака “? „Се сомневам во тоа“, додаде Сандерс.