Шефот на руската надворешна разузнавачка служба им порача на Соединетите држави дека поддршката на Западот за Украина ќе го претвори конфликтот во „втор Виетнам“ што ќе претставува проблем за САД во наредните години. Минатата година, со инвазијата на Украина, Путин започна војна во која стотици илјади луѓе беа убиени или ранети.
Западот ѝ даде на Украина помош и оружје во вредност од над 246 милијарди долари, но украинската контраофанзива пропадна и Русија сè уште контролира нешто помалку од една петтина од територијата на Украина.
„Украина ќе се претвори во црна дупка која ќе апсорбира се повеќе ресурси и луѓе“, напиша Сергеј Наришкин, шеф на руската служба за надворешно разузнавање (СВР), во весникот на СВР. „На крајот, САД ризикуваат да создадат втор Виетнам за себе и секоја нова американска администрација ќе мора да се обидува да се справи со тоа“, додаде тој.
Американскиот претседател Џо Бајден предупреди дека директен конфликт меѓу НАТО и Русија може да предизвика трета светска војна и постојано ја отфрла можноста за испраќање американски војници во Украина.
Во Виетнамската војна, САД го поддржаа Јужен Виетнам против комунистичкиот Северен Виетнам, кој беше поддржан од Кина и Советскиот Сојуз. САД на крајот се повлекоа од Виетнам, а две години подоцна, во 1975 година, Јужен Виетнам беше поразен. САД изгубија повеќе од 58 илјади војници во војната.
Во средата, Бајден ги замоли републиканците за нова инфузија на воена помош за Украина.
„Ако Путин ја преземе Украина, тој нема да застане тука“, рече Бајден, предвидувајќи дека Путин ќе продолжи да ги напаѓа сојузниците на САД во НАТО.
„Тогаш“, додаде Бајден, „ќе имаме нешто што не го бараме и го немаме денес: Американски војници кои се борат против руските војници“. Кремљ, пак, соопшти дека Бајден ги пали парите на американските даночни обврзници во воена печка.