Шпанскиот министер за социјални права, Јоне Белара повика на покренување обвинение против израелскиот премиер Бенјамин Нетанјаху пред Меѓународниот кривичен суд (МКС) во Хаг за израелските воздушни напади во Појасот Газа.
Во видеото објавено на платформата Х, порано позната како Твитер, левичарскиот министер рече дека ова важи и за луѓето одговорни за бомбардирањето во кое загинаа илјадници жители на Газа.
Министерот од партијата Унидас Подемос, коалиционен партнер на премиерот Педро Санчез, ги повика европските земји да ги прекинат дипломатските односи со Израел и да воведат економски санкции и ембарго за оружје за Израел.
Премиерот Педро Санчез од шпанската социјалистичка работничка партија ПСОЕ повика на прекин на огнот во војната меѓу исламистичкото екстремистичко движење Хамас и Израел, како и за дипломатско решение на конфликтот.
Вооружени членови на Хамас извршија терористички напад на 7 октомври, во кој во Израел загинаа повеќе од 1.400 луѓе. Израел одговори со бомбардирање на Појасот Газа со намера да го уништи Хамас.
Санчез го бранеше и шефот на ОН, Антонио Гутереш, откако Израел побара од него да се повлече од функцијата генерален секретар, обвинувајќи го за пристрасност кога станува збор за Хамас.
Критиките на шпанската влада против израелската воена офанзива во Појасот Газа предизвикаа спор меѓу двете земји пред неколку дена.
Амбасадата на Израел во Мадрид издаде соопштение во кое се вели дека „одредени членови на шпанската влада одлучија да се усогласат со овој тероризам сличен на ИД (Исламска држава).
Меѓу другото, амбасадата зборуваше за „апсолутно неморални изјави кои ја загрозуваат безбедноста на еврејските заедници во Шпанија“, без, сепак, експлицитно да ја спомене министерката Белара.