ГЕРМАНСКИОТ претседател Франк-Валтер Штајнмаер го замолил кинескиот претседател Си Џинпинг во телефонски разговор да го искористи своето влијание врз рускиот претседател Владимир Путин за да стави крај на војната во Украина, соопшти кабинетот на германскиот претседател.
„Германскиот претседател Франк-Валтер Штајнмаер му телефонираше на кинескиот претседател Си Џинпинг. Претседателот го истакна заедничкиот интерес на Кина и Европа за ставање крај на војната. Тој побара од Си Џинпинг да го искористи своето влијание врз Русија и да влијае на Путин во овој поглед“, се вели во соопштението.
Во разговорот, кој траел еден час, станало збор и за билатералните односи и актуелната ситуација во Кина во однос на коронавирусот. Од почетокот на војната во Украина, Западот се обидува да изврши притисок врз Кина, која ја критикува за блискоста со Москва.
За време на неодамнешната посета на германскиот канцелар Олаф Шолц на Кина, Си Џинпинг официјално го изрази своето противење на нуклеарната ескалација на војната во Украина. Штајнмаер му се заблагодари на кинескиот претседател за јасното отфрлање на нуклеарните закани од Русија, се вели во соопштението. И покрај заладените односи со Пекинг во последните две години, ЕУ бара поддршка од кинескиот лидер за да се стави крај на војната во Украина.
На почетокот на ноември, Шолц беше првиот лидер на групата Г7 што ја посети Кина од почетокот на пандемијата на коронавирус. Посетата предизвика бројни критики, но Шолц ја брани потребата од дијалог со Пекинг. Телефонскиот разговор меѓу германскиот претседател и неговиот кинески колега се одржа по повод петгодишнината од билатералните односи меѓу Германија и Кина.