Скопје е првиот град во Северна Македонија што се приклучи на Зелените градови на ЕБОР и го започна развојот на акциониот план. Во март 2019 година, Градот Скопје и ЕБОР го започнаа Акциониот план за зелен град следејќи ја методологијата на ЕБОР, како дел од вклучувањето на градот во програмата на Зелените градови на ЕБОР, соопшти градоначалникот Петре Шилегов.
„Акциониот план ќе му помогне на Скопје да ги идентификува, да им даде приоритет и да ги реши своите најгорливи еколошки предизвици со одржливи инвестиции во инфраструктурата и соодветни политички мерки. Верувам дека мерките предложени од акциониот план ќе го подобрат животот на нашите жители.
Горди сме што Скопје е првиот град на Западен Балкан што го воведува систем BRT – Bus Rapid Transit. За граѓаните на Скопје ова е остварување на сонот по 40 години. Сега добиваме подобар систем за транспорт во согласност со нашите потреби. Добиваме брз, безбеден и одржлив јавен превоз, што ќе биде атрактивен и ќе го олесни намалувањето на сообраќајниот метеж и загадувањето на воздухот“, истакна тој.