Службата за безбедност на Украина заплени имот на руски бизнисмен во вредност од 54 милиони долари

Службата за безбедност на Украина (СБУ) соопшти дека запленила имот на компанија која наводно е во сопственост на рускиот бизнисмен Алишер Усманов во вредност од 54 милиони долари.

„Службата за безбедност продолжува да ги идентификува и блокира средствата на претставниците кои го поддржуваат Кремљ и корпорациите вклучени во финансирањето на војната против Украина“, се вели во соопштението на СБУ на нивниот канал на социјалната мрежа Телеграм.

Во објавата се додава дека преку истражна и оперативна работа заедно со детективите на СБУ, запленети се повеќе од 160.000 тони железна руда, за која е утврдено дека припаѓа на компанијата на рускиот олигарх Усманов, кој е дел од најтесниот круг на највисокото воено и политичкото раководство на Кремљ.