Еден од четворицата полицајци од Минеаполис обвинет за смртта на Афроамериканецот Џорџ Флојд, Томас Лејн, бил ослободен од притвор, откако ја платил кауцијата.
Адвокатот на 37-годишниот поранешен полицаец потврдил дека за Лејн била платена кауција од 750.000 американски долари и дека станува збор за условна кауција.
Локалниот весник „Стар трибјун“ пишува дека парите најмногу се собирале преку Интернет од донации на „Пејпал“, односно плаќања на веб-страница отворена за да соберат средства за негово ослободување од притвор.
Во описот на таа страница се наведува дека „кауцијата на Лејн била неправедно висока и дека тој сторил сé што може за да го спаси животот на Флојд“.
Следното рочиште на Лејн е закажано за 29 јуни, а неговиот адвокат планира да поднесе предлог за отфрлање на обвиненијата, објавиле медиумите.