Илјадници граѓани на Бугарија излегле на плоштадот во центарот на Софија за да го изразат незадоволството од владата и да побараат оставка. 56-от по ред протест, прогласен за „Големо народно востание“, започнал во 8 часот наутро со силно извикување „оставка“, блокада на парламентот на почетокот на есенската пленарна седница и судири со полицијата, објавуваат бугарските медиуми.
Зградата на поранешниот Партиски дом, каде што новата пленарна сала денес ги пречека пратениците за првпат, била буквално под опсада од незадоволната толпа. Полицијата и специјалните единици држеле тесен кордон од утро до пладне.
Јајца, јаболка, домати и шишиња минерална вода неколку пати летнале кон униформираните полицајци, но имало и камења, како и разни предмети од блискиот шаторски камп. Во еден момент собраните демонстранти запалиле слама, која започнала брзо да гори, што принудило да пристигне и противпожарно возило.
Демонстрантите, исто така, ги треселе полициските автомобили и ги напаѓале полицајците со бибер спреј за самоодбрана, рече Георги Хаџиев, началник на полицијата во Софија. Околу 45 лица, вклучително и полицајци, завршиле во болница.
Протестот во средата се совпадна со седницата на парламентот посветена на расправата за амандманите на уставот предложени од централно-десничарската партија ГЕРБ на премиерот Бојко Борисов – и нашироко се гледа како начин неговиот кабинет да го продолжи својот живот до март 2021 година, кога се закажани следните избори.
Иако ги иницираше измените, Борисов, наводно, не се појавил во парламентот во средата. Средбата сè уште не е завршена и не е јасно како ќе се развива расправата до крајот на денот.
Новиот нацрт на уставот, кој бројните опозициски гласови и законодовните експерти го сметаат за длабоко проблематичен, привлече мала поддршка надвор од кругот на самиот Борисов во последните неколкудневни партиски дискусии.