Во израелски воздушен напад рано утринава загинаа шест Палестинци на окупираниот Западен Брег, а една израелска полицајка е убиена кога нејзиното возило наишло на поставена бомба покрај патот, соопштија извори од двете страни.
Насилството на Западниот Брег ескалира од почетокот на војната меѓу Израел и Хамас, кој владее со друга палестинска територија, појасот Газа.
Израелските сили често навлегуваат во окупирана територија, вклучително и упориштето на екстремистите Џенин и блискиот бегалски камп.
„Шест лица беа убиени во Џенин кога окупаторот бомбардираше група граѓани“, соопшти Министерството за здравство на палестинската управа со седиште во Рамала.
Една израелска полицајка е убиена за време на операција во бегалскиот камп Џенин, соопшти армијата, додавајќи дека уште тројца полицајци се ранети.
Не е јасно дали Палестинците и Израелката загинале за време на истата операција.
Палестинската новинска агенција Вафа рано утринава објави дека големи израелски сили се распоредени во Џенин и дека шест Палестинци, од кои четворица браќа, биле убиени во напад на израелско беспилотно летало.
Нападите на израелската војска во Џенин често предизвикуваат судири меѓу војниците и палестинските екстремисти. Армијата тврди дека цели на „терористи“ во рации, а палестинското Министерство за здравство вели дека многу од жртвите се цивили.
Западниот Брег е под израелска окупација од Шестдневната војна во 1967 година.
Од почетокот на војната меѓу Израел и Хамас на 7 октомври, според палестинското Министерство за здравство, најмалку 327 луѓе се убиени на Западниот Брег. Тие беа убиени од израелски војници и еврејски доселеници.