Претставниците на „Вајмарската тројка“ во која се дел државниот секретар за Европа во Советот на министри на Франција, Лоренс Бун, германската министерка за Европа и клима, Ана Лирман и полскиот министер за ЕУ Шимон Шинковски вел Сенк, се во Скопје да разговараат со претседателот, премиерот, претседателот на парламентот, но и со опозицијата за преговарачкиот процес на Северна Македонија со ЕУ и обврските што државата ги има, вклучително и уставните измени.
И на прес-конференцијата пред средбата со вицепремиерот Бојан Маричиќ и на разговорот со Димитар Ковачевски, беше оценето дека Северна Македонија се наоѓа пред „уникатна можност да го направи клучниот чекор во европската интеграција и да ја обезбеди својата европска перспектива, со можност за полноправно членство во Европската унија до 2030 година“.
Според соопштението од владината прес-служба, „ова ќе придонесе за задолжително и забрзано спроведување на европските стандарди во сите области важни за граѓаните, како што се подобрувањето на животниот стандард и владеењето на правото“, а проширувањето на ЕУ не е само техничка процедура, но геополитички приоритет на ЕУ.
-Беше изразено „недвосмислено очекување дека сите политички субјекти во земјата ќе ја потврдат европската ориентација со давање поддршка во парламентот за претстојните одлуки кои се дел од преговарачката рамка на Република Северна Македонија со ЕУ“, се вели во соопштението.
Вашата поддршка го дава многу потребниот кредибилитет на европската перспектива на Република Северна Македонија и посетата доаѓа во многу важен момент за нас. Владата има силен политички фокус на обединување во парламентот за понатамошен напредок на патот на евроинтеграциите, што е од суштинско значење за натамошното воспоставување на европските стандарди во земјата. Ние веќе сме Европа во редуцирана форма, а со дополнувањата на уставот на другите етнички заедници кои живеат овде, испраќаме значајна порака и до регионот и до Европа, дека нашето место е во ЕУ, рече Димитар Ковачевски, цитиран во соопштението.