Комисијата за надворешна политика при Собранието вчера не ја усвои нацрт-резолуцијата за почитување на стандардите во кривичните постапки против поранешните водачи на косовската ОВК, бидејќи немаше кворум за донесување одлуки, откако претставниците на ВМРО-ДПМНЕ и СДСМ не присуствувале на седницата.
Пратениците на двете најголеми партии во Македонија со тоа практично го блокираа усвојувањето на резолуцијата за поддршка на водачите на поранешната ОВК, Хашим Тачи, Кадри Весељи, Јакуп Красниќи и Реџеп Сељими, на кои им се суди за воени злосторства пред Хашкиот трибунал.
На седницата биле присутни само пратениците од коалицијата Европски фронт, владејачката ВЛЕН, Алијансата за Албанците и пратеникот Реџеп Исмаил.
Дебатата за ова прашање беше одложена на неодредено време, а албанските пратеници најавија дека нема да се откажат од ставање на дневен ред „резолуцијата за почитување на стандардите за фер судење во меѓународното судење на поранешните раководители на косовските институции“.
Кон средината на февруари, пратениците на ДУИ доставија до Собранието предлог- резолуција за почитување на стандардите за фер постапка во процесот што се води во Хаг против поранешните водачи на косовската ОВК.
„Резолуцијата се заснова на уставните принципи и меѓународните судски стандарди, потврдувајќи ја посветеноста на владеењето на правото, судската независност и целосното почитување на основните човекови права, како што се дефинирани во Европската конвенција за човекови права, Меѓународниот пакт за граѓански и политички права и Универзалната декларација за човекови права“, соопштија тогаш од таборот на Али Ахмети.
Слични резолуции претходно беа усвоени во косовскиот и албанскиот парламент.