Српскиот претседател Александар Вучиќ вчера изјави дека државата нема никаква врска со аферата во која беа запленети пет тони марихуана од имотот на претставник на владејачката Српска напредна партија (СПП) во близина на градот Крушевац, централна Србија, објавија српските медиуми.
Тој додаде дека полицијата „уапсила луѓе“ и дека неговите политички противници „сè превртуваат наопаку“ и тврдат дека зад тоа стои државата.
„Луѓето од Управата за криминалистичка полиција пронајдоа пет тони некаква дрога. Сега, дали само синот знаел за тоа или и синот и таткото, тоа е друго прашање, нека утврдат надлежните органи, не сакам ништо да претпоставувам“, изјави Вучиќ за телевизијата Пинк.
На 29 јануари, српската полиција, во соработка со Обвинителството за организиран криминал (OОК), заплени пет тони марихуана во реонот на селото Коњух во близина на Крушевац.
Беше објавено дека осомничените се Александар Мијаиловиќ, Небојша Спасојевиќ и Раде Спасојевиќ (татко и син), Иван Драгниќ и Урош Младеновски.
Обвинителството предложи издавање налог за апсење, вклучително и меѓународен, за осомничениот Александар Мијаиловиќ, кој е идентификуван како организатор на криминална група и е во бегство.
OОК објави дека организираната криминална група работела на меѓународно ниво, стекнувајќи пет тони наркотична супстанца марихуана на територијата на Македонија во периодот од почетокот на јануари до 29 јануари.
Претседателот на опозициското Народно движење на Србија, Мирослав Алексиќ, објави на социјалната мрежа Х тврдење дека еден од уапсените во заплената на дрога е општински советник од владејачката Српска напредна партија (СПП) во Крушевац.
Алексиќ рече дека уапсеното лице е „пријател и близок соработник“ на семејството на српскиот министер за одбрана – Братислав Гашиќ.
Гашиќ, кој е роден во Крушевац, им честиташе на полицијата и другите безбедносни служби за операцијата, додавајќи дека таа покажува дека никој во Србија не е над законот, објави весникот „Курир“.
Тој не спомена конкретни имиња и не ги коментираше тврдењата на Алексиќ.
Заменик-претседателката на градската организација на СПП во Крушевац, Невена Ѓуриќ Никитовиќ, исто така објави соопштение во кое наведува дека „државата е јасна и немилосрдна во борбата против криминалот и корупцијата“.