Претседателот на Србија, Александар Вучиќ, по седницата на проширениот колегиум на началниците на Генералштабовите, изјави дека денешниот состанок е „една од пресвртниците за промените што треба да дојдат во српските вооружени сили“ и дека денес светот функционира без закон, правда и какви било правила. Тој се осврна и на најактуелната тема – конфликтот меѓу Иран и Израел, како и на реакцијата на Соединетите Американски Држави.
Како што рече, Србија ја промени својата воена доктрина.
„Според новата доктрина, нашата армија мора да биде неспоредливо посилна. Во изминатата година направивме многу за модернизација и унапредување на нашата армија. Денес живееме во свет во кој законот и правдата одамна престанаа да постојат, а сега и правилата исчезнаа. Мора да го прифатиме и разбереме тоа“, рече Вучиќ, пренесе „Блиц“.
Тој додаде дека е „многу тешко да се разбере и прифати тоа“.
„Но, мораме. Да бидеме членка на Обединетите нации, да имаме гарантиран територијален интегритет врз основа на одлуките на ОН – тоа денес ништо не значи. Големите сили брутално го газат тоа кога им одговара, измислувајќи некои нови, непостоечки принципи. И ние мора да се прилагодиме на тоа. Мораме да го подигнеме нивото на нашите одбранбени способности и сè што правиме, го правиме за граѓаните на Србија“, нагласи Вучиќ.
„САД го прекршија меѓународното право“
Зборувајќи за војната меѓу Израел и Иран, Вучиќ се осврна и на ставот на Србија кон тие земји.
„И двата народа се пријателски настроени кон нас. Сакаме мир и не разбирам зошто не се обидоа да решат сè дипломатски. Да бидам попрецизен – бидејќи човек мора да биде искрен кон себе и кон земјата – сакаме најблиски односи со Соединетите Американски Држави, стратешко партнерство. Ние сме мала земја. Но, дали САД го прекршиле јавното меѓународно право? Апсолутно го прекршиле“, рече Вучиќ.
Додаде дека Србија зборувала за тоа и во други случаи.
„Нема закон, нема правда. И, што е поважно, денес нема правила. А сега да одговорам на вашето прашање: како Западот сега ќе разговара со Русија – или со некој друг – за кршење на територијалниот интегритет? Сите веќе го погазивте. Го погазивте со примерот на Србија и СРЈ. Но, многумина го заборавија тоа – тоа беше одамна, пред 26 години. И ова се случува сега пред сите. Па кои се тие принципи тогаш? Кои се правилата според кои мирот некогаш ќе биде можен во светот? Зошто го велам ова? Затоа што тонеме во целосен хаос. Целиот свет. Цената на нафтата е 25 проценти повисока денес отколку што беше пред десет дена. Ги држиме цените на пумпите со сила за да не експлодираат. Брент се отвори утрово на 78,4. Беше на 64. И не станува збор само за цената на нафтата. Цената на гасот се зголеми. Тоа веќе не е прашање на цена“, рече Вучиќ.
Одговори и на прашањето за извозот на муниција во Израел и рече дека сè е запрено по почетокот на војната во Иран.
„Продаваме муниција, која директно издржува 24.000 луѓе, а индиректно 50.000. Со членовите на семејството, тоа се околу 150.000 луѓе во оваа земја. Нема да оставам 150.000 луѓе без леб. Напротив, моја работа како претседател е да отворам пазари за нив. И им ги отворив речиси сите азиски пазари. И американскиот пазар“, рече Вучиќ, додавајќи дека Србија извезува муниција веќе 15 години.