Утврдиме најмалку 10 нови турски инвестиции, во зона која што ја разработуваме на Коридорот 10, во Гевгелија, рече денеска премиерот Зоран Заев а новинарско прашање во врска со работната вечера вчера со претседателот на Турција Реџеп Таип Ердоган.
– Се работи за инвестиции од секаков вид во преработувачка индустрија, коишто се стратешки поставени за европскиот пазар, нешто за кое што нашите комори подолг период разговараа, а сега го утврдивме. Заедно со претседателот на вечерата беа соодветните министри со кои што разговаравме и за ваквите детали. Разговаравме секако и за соработката меѓу армиите. Ние сме членка на НАТО. Многу соработува со Турција. Турција е еден од значајните донатори на Република Северна Македонија во армиска опрема. Овој пат имаме набавки од наши пари, но секако очекуваме и дополнителен придонес од Турција, затоа што Турција е наш голем пријател, истакна Заев.
Ги спомена и 30-те илјади вакцини, за кои претходно информираше Филипче, појаснувајќи дека во земјава треба да стигнат во рок од седум до десет дена.
– Секако поради големата љубов кон Македонија и на претседателот Ердоган, но и на раководството на пријателска Турција веднаш на наше барање ни излегоа во пресрет со 30 илјади вакцини. Додека ги чекаме новите количини, овие ни се добредојдени, рече Заев .
Акцентот на разговорите на министерот Филипче со турските домаќини, пак, бил ставен во делот на претстојното отпочнување на Турција да произведува вакцини против ковид-19.