Загадувањето ја загрозува пештерата Сак Актун на полуостровот Јукатан, подземен комплекс кој многу мексикански експерти го карактеризираат како едно од најважните и најзначајните подводни археолошки наоѓалишта во светот.
Археологот Гилермо де Анда предупредува дека загадувањето и развојот на околината го загрозуваат овој локалитет.
„Сак Актун веројатно е најзначајното подводно археолошко наоѓалиште на светот“, смета Де Анда.
Туристите денеска влегуваат под вода при влез во пештерата, а еден од главните патишта во регионот поминува токму над делови од овој подводен археолошки комплекс.
Степенот на киселост во пештерата е доста висок, а се претпоставува дека тоа е последица на околните депонии на отворено.
Многу пештери во областа Јукатан некогаш се наоѓале над нивото на морето.
Во нив биле пронајдени и докази околу раното присуство на луѓе, како и остатоци од мајанската култура.