Критичарот на Кремљ, Алексеј Навални, „горе-долу“ се опорави од штрајкот со глад и му беше дозволено да комуницира со своето семејство, изјави во четвртокот директорот на руската Федерална служба за затвори.
Навални, најистакнатиот критичар на претседателот Владимир Путин, издржува затворска казна од две и пол години за кршење на условната слобода.
„Можам да кажам дека тој „горе-долу“ се опорави“, рече Александар Калашников, директорот на Федералната казнена служба, пишува новинската агенција ТАСС.
„Тој веќе има 82 килограми, јаде нормално и може да комуницира со своето семејство “.
Опозицискиот политичар Навални (44) штрајкуваше со глад кон крајот на март за да добие соодветно лекување во затвор за акутните болки во грбот и нозете.
Влошувањето на неговата здравствена состојба ги натера неговите сојузници да ги повикаат приврзаниците на улиците и да побараат соодветно згрижување, но одѕивот на тие собири беше поскромен отколку што се очекуваше.
Навални, кој преживеа труење со „Новичок“ минатата година, според германските лекари, го прекинал штрајкот со глад во април, откако доби подобар третман.
Иван Жданов, еден од најблиските сојузници на Навални, во четвртокот изјави дека здравствената состојба му е генерално задоволителна.
Русија работи на прогласување на антикорупциската фондација и регионалните канцеларии на Навални за екстремистички.
Случајот ги принуди неговите сојузници да ги прекинат повеќето активности.
Доколку Фондацијата Навални и регионалните канцеларии се официјално прогласени за екстремисти, властите ќе можат да ги затворат активистите и да ги замрзнат нивните сметки во банка. Следното рочиште за случајот е закажано за 9 јуни.
Сојузниците на Навални велат дека обвинувањата за екстремизам се обид да се замолчи политичкото спротивставување на владејачката партија Единствена Русија пред парламентарните избори во септември.