Значително намалување на сообраќајните незгоди, вчера 103 санкции за брзо возење во Охрид

од Берта Китинска

Мобилната единица за безбедност во сообраќајот при Министерството за внатрешни работи вчера (08.01.2021) спроведе засилена акциска контрола во областа на сообраќајот на територијата на Охрид, при што санкционирани се 103 возачи, кои возеле со брзина поголема од дозволената, соопшти денеска портпаролот на МВР Тони Ангеловски на прес конференција во Охрид.

„Засилените контроли продолжуваат и денеска и во наредните денови и евидентно е дека имаме намалување на бројот на сообраќајни незгоди во периодот кога овие контроли се спроведуваат. Во ноември 2020 споредено со ноември 2019 имавме намалување од 21 отсто, а кога ќе ги споредиме декември 2020 со декември 2019 имаме намалување од 23 отсто на бројот на сообраќајни незгоди. Како резултат на преземените активности, 2020 година е со најниска бројка на жртви во сообраќајот во историјата на државата“, рече Ангеловски.

Тој вели дека на територијата на СВР Охрид споредено декември 2020 со декември 2019 година сообраќајните незгоди се намалени за 11 отсто.

„Засилените сообраќајни контроли продолжуваат и во наредните денови. Апелираме граѓаните да ги почитуваат сообраќајните правила и прописи за да ја зголемиме безбедноста во сообраќајот“, рече Ангеловски.

 

Слични содржини