Како лидер на Алтернатива, имам мандат и должност да се среќавам со сите политички актери во земјата. Така сум работел досега и така ќе работам и во иднина, објави претседателот на партијата Африм Гаши коментирајќи ги наводите на пратеникот Скендер Реџепи Зејд кој денеска објави фотографија од него и Зоран Заев сликани во угостителски објект во Струмица.
Гаши додава дека нема ништо посебно и мистериозно во неговата средба со поранешниот премиер Заев.
-Јас го разбирам интересот на медиумите за оваа средба, но мислам дека вистинското прашање не е кој, каде и зашто се среќавам, туку зошто, по чиј налог и од каков страв ме следат службите СДСМ-ДУИ?, прашува лидерот на Алтернатива.
Реџепи покрај споделената фотографија на социјалните мрежи, постави и „прашање од еден милион евра“.
-Зошто требаше да оди дури до Струмица? Активистите на Алтернатива, како и пошироката јавност, заслужуваат да ја знаат вистината за оваа средба, напиша Реџепи Зејд на социјалните мрежи.
Зејд во јуни минатата година ја напушти матичната партија Алтернатива и стана независен пратеник. Алтернатива пред еден месец излезе од владината коалиција и веќе делува како опозиција на политичката сцена. На најзино место во Владата се приклучи Алијанса за Албанците која доби три министерски места.