Кинеската мисија во Европската унија денеска ја осуди проценката на НАТО од вчерашниот самит дека Кина претставува „системски предизвик“.
Лидерите на НАТО вчера изразија загриженост за амбициите на Кина за развој на нуклеарниот арсенал, означувајќи ја како системски предизвик за време на самитот на кој американскиот претседател Џо Бајден ги повика своите колеги од НАТО да се спротивстават на кинескиот авторитаризам и растечката воена моќ.
„Амбициите и однесувањето на Кина претставуваат предизвик за меѓународниот поредок заснован на правила и во области од значење за безбедноста на Алијансата“, заклучија лидерите на НАТО.
„НАТО кажува невистини за мирољубивиот развој на Кина, погрешно ја проценува меѓународната ситуација и укажува на менталитетот на Студена војна“, стои во одговорот на Кина објавен на веб-страницата на кинеската мисија, пренесува „Ројтерс“.
Се додава дека Кина е секогаш посветена на мирољубив развој и не претставува никому системски предизвик, но дека нема да остане без одговор ако некој стави такви предизвици пред неа.
Земјите на Г7, кои се состанаа во Велика Британија за време на викендот, ја критикуваа Кина за нејзините човекови права во провинцијата Синџијанг, повика на висок степен на автономија во Хонг Конг и побара темелна истрага за потеклото на коронавирусот во Кина.
Кинеската амбасада во Лондон објави дека решително се спротивставува на споменувањето на Синџијанг, Хонг Конг и Тајван, наведувајќи дека фактите се искривени и со тоа се откриваат злобните намери на повеќе земји, како што се САД.