Премиерот Зоран Заев денес најави дека во случај да има граѓани кои нема да сакаат да примат попишувачи кои не се вакцинирани, ќе им се овозможи да добијат вакциниран попишувач.
-Мал е бројот на невакцинираните попишувачи и ќе се најде решение и за овој проблем, поради кој граѓаните се загрижени, рече Заев.
Теренското попишување почнува в недела а од владата и од заводот за статистика тврдат дека се е подготвено за неговото спроведување и во услови на ковид пандемија.
-Сигурни сме како Влада дека граѓаните со доверба ќе ги примат попишувачите и ќе им ги дадат потребните податоци коишто ќе овозможат подобра иднина за сите нас и за земјата во целина, изјави вчера владиниот портпарол Душко Арсовски.
Арсовски соопшти дека во сите комисии на 50-те пописни реони се завршени обуките на реонски инструктори и реонските попишувачи.
Пописот ќе се спроведува до крајот на месецот.