Биљали: Македонија ќе влезеше во ЕУ во 2010, доколку Груевски не ја провоцираше Грција со патриотската реторика

Да не беше Груевски да ја провоцираше Грција во 2006 година со таа патриотска реторика, најверојатно Македонија ќе беше членка на ЕУ во 2010 година, вели политичкиот аналитичар, Мерсел Биљали во синоќешното гостување на емисијата „Клик плус“.

Тој смета дека ЕУ е само далечен сон, и дека не верува дека некоја од земјите на Западен Балкан ќе влезе во Унијата во следните 15-20 години.

-Ние патувавме заедно со Хрватска, дури и пред Хрватска бевме. Во однос на ЕУ, експресно се возеше по колосекот и се очекуваше 2010 да стане членка на ЕУ, оти преговори добивме, оти статус на кандидат добивме 2005. Што стана сега? Црна гора преговара 12 години. Србите преговараат околу 8 години, и сите стагнираат, рече Биљали.