Членките на НАТО денеска ја осудија одлуката на Русија да се повлече од Договорот за конвенционални сили во Европа (CFE), клучен договор по Студената војна, додавајќи дека и тие ќе го суспендираат онолку долго колку што е потребно.
„Повлекувањето на Русија од договорот е последниот во низата потези кои систематски ја поткопуваат евроатлантската безбедност. Како последица на тоа, земјите-членки имаат намера да ја прекинат работата на CFE онолку долго колку што е потребно, во согласност со нивните права според меѓународното право. Ова е одлука која е целосно поддржана од сите сојузници на НАТО“, соопшти НАТО, пренесе „Ројтерс“.
Претходно денеска, Русија официјално се повлече од CFE, кој беше дизајниран да го деескалира потенцијалниот конфликт меѓу Истокот и Западот.
North Atlantic Council Statement on the Allied response to Russia's withdrawal from the Treaty on Conventional Armed Forces in Europe
Tap the image to read the statement ↓
— NATO (@NATO) November 7, 2023
„Тој меѓународно правен документ, кој нашата земја го суспендираше во 2007 година, конечно ни стана историја“, беше објавено на веб-страницата на руското министерство за надворешни работи.
Тој договор од 1990 година, преговаран и склучен на крајот на Студената војна и потпишан една година по падот на Берлинскиот ѕид, постави ограничувања на распоредувањето на воена опрема за одржување на воената рамнотежа меѓу НАТО и тогашните држави од Варшавскиот пакт.
Русија го суспендираше своето учество во договорот во 2007 година и го суспендира активното учество во 2015 година.
Во мај 2023 година, рускиот претседател Владимир Путин потпиша указ за откажување на договорот, кој НАТО го оцени како „поткопување на евроатлантската безбедност“.