Администрацијата на претседателот Доналд Трамп го отфрли долгоочекуваниот план на арапските лидери за обнова на Газа, тврдејќи дека претседателот се држи до сопствената визија која вклучува протерување на палестинските жители и претворање на територијата во „ривиера“ под американска контрола.
„Сегашниот предлог не ја зема предвид реалноста дека Газа повеќе не е погодна за живеење. Жителите не можат да живеат хумано на територија покриена со урнатини и неексплодирани проектили“, изјави Брајан Хјуз, портпарол на Советот за национална безбедност. „Претседателот Трамп стои на својот став дека Газа мора да се обнови без Хамас. Со нетрпение очекуваме понатамошни дискусии за да донесеме мир и просперитет во регионот“, додава Хјуз.
Планот за реконструкција на Појасот Газа, предложен од Египет, бара Хамас да ја предаде власта на привремена администрација додека реформираната палестинска управа не ја преземе контролата. Овој план би овозможил околу два милиони Палестинци да останат во Газа, за разлика од идејата на Трамп, која предвидува нивно раселување.
Израел исто како и САД јасно стави до знаење дека не прифаќа никаква улога на палестинската управа во Газа.