На Самитот на албанската дијаспора во Тирана, претседателот на ДУИ, Али Ахмети се осврнал на она што го опишал како „вистинска опасност“ за албанскиот јазик во Македонија, по протестот на студентите да полагаат правосуден испит на албански јазик. Враќајќи се на потеклото на Охридскиот договор, Ахмети потсетил дека официјалниот статус на албанскиот јазик не е само домашен правен акт, туку меѓународна гаранција запечатена од САД, ЕУ и НАТО.
Тој ги повикал политичките фактори и меѓународните гаранти да го спречат секој обид за „нарушување“ на, како што вели, историското достигнување, нагласувајќи дека стабилноста и иднината на соседната држава се неразделно поврзани со коегзистенцијата и еднаквите права на Албанците.
„Што се однесува до албанскиот јазик во Македонија, тоа е реална опасност што мислам дека мора да ја надминеме. Албанскиот јазик во Македонија е потпишан и гарантиран од САД, претставувани од претставникот на Џорџ Буш, тогашниот претседател, како и од ЕУ и од НАТО претставувано од Робертсон. Затоа го потпишавме воениот договор, со претседателот Трајковски како ОВК, го прифативме Охридскиот договор и работевме заедно со ЕУ, САД и НАТО. Успехот на овој договор, од националните симболи, образованието на албански јазик и употребата на албанскиот јазик во администрацијата и склучувањето на законот за албанскиот јазик е што е во согласност со Охридскиот договор.
Јазикот што го зборуваат над 20% од граѓаните во тогашна Република Македонија, е исто така официјален.
Секој друг коментар, за подобрување на законот или за негова промена, е само за еродирање на Охридскиот договор и неговиот карактер. Имаме заедничка одговорност, Вашингтон, Брисел, НАТО, албанските и македонските политички сили. Македонија има иднина во коегзистенција, ко-владеење само со Албанците. Без Албанците, таа не може да преживее и нејзините денови би биле избројани“, рекол Ахмети, пренесуваат медиумите на албански јазик во земјава.