Дво-третинските законски решенија меѓу кои и Законот за Јавно обвинителство и Законот за одбрана ќе се гласаат утре, пред распуштање на Собранието. Оваа информација ја потврди пратеникот на ДУИ, Артан Груби, кој на прес конференција ги повика сите пратеници кои сакаат европска Македонија утре да се изјаснат позитивно за овие закони, важни за државата.
Фото: Борче Поповски
Инаку пратениците од вчера се на маратонски седници, за да може до утре, пред распуштање на Собранието да бидат донесени законите кои треба да добијат поддршка од повеќе од 80 пратеници, едниот важен за почеток на преговорите со Европската Унија, а другиот за веќе извесниот влез во НАТО идниот месец.
Пратеникот на СДСМ, Костадин Костадинов денеска рече дека иако не може да каже дека имаат 80 пратеници врзани во крпче, сепак е оптимист дека Законот за Јавно обвинителство ќе добие поддршка од повеќе од 80 пратеници.
Законот за одбрана пак, иако има ветена поддршка од сите пратеници, опозицијата одбива да го гласа бидејќи во него ќе стоело „Армија на Република Северна Македонија“, иако армијата со указ веќе го доби новото уставно име.
А.Т.