Бугарскиот амбасадор побарал итно расчистување на случајот во кој е прободен навивач на Левски

Министерството за надворешни работи на Бугарија е информирано за повреден бугарски државјанин во инцидент во Скопје пред фудбалскиот натпревар меѓу „Левски“ и „Шкупи“. Според првичните податоци, се работи за напад во северниот дел на градот и нанесени убодни рани со ладно оружје.

Бугарското МНР за „БНР“ соопштиле дека будно ја следат состојбата. Бугарскиот амбасадор во земјава веќе остварил разговор со надлежните органи и инсистирал на итно расветлување на случајот и обезбедување на безбедноста на бугарските поддржувачи.

Конзулот на Бугарија во Скопје веќе го посетил повредениот бугарски државјанин во болница каде бил примен на лекување. Според достапните информации моментално се расчистува неговата состојба, но нема ризик по неговиот живот.