Данска објави дека нема да ја продолжи истрагата за експлозиите во 2022 година на гасоводите „Северен тек“ преку кои руски гас се пренесува во Германија.
„Нема доволно основи за поведување кривична постапка во Данска. Полицијата во Копенхаген одлучи да ја затвори кривичната истрага за експлозиите“, се вели во соопштението на данската полиција.
Во соопштението се наведува дека полицијата верува дека имало намерна саботажа на гасоводот, пренесува „Ројтерс“.
Шведска се откажа од истрагата за експлозиите на гасоводите „Северен тек“ претходно овој месец, велејќи дека нема јурисдикција во случајот, но ги предаде откриените докази на германските истражители, кои допрва треба да објават некакви наоди.
„Северен тек“ 1 и 2, двата гасовода кои беа поставени паралелно под Балтичкото Море, директно ги поврзуваа најголемиот производител на гас, Русија и најголемиот европски клиент, Германија.
Освен геополитичкото влијание, протекувањето на гасоводот „Северен тек“ беше огромна еколошка катастрофа со погодени локални диви животни и огромни количества метан ослободени во Балтичкото Море, што аналитичарите веруваат дека може да биде најголемото ослободување на метан од човекова активност.