Претседателите на Кина и Русија, Си Џинпинг и Владимир Путин денеска изразија меѓусебна поддршка и желба за зајакнување на билатералните врски поради кризата во односите со Западот.
Си и Путин се сретнаа денеска на маргините на самитот на Шангајската организација за соработка во узбекистанскиот град Самарканд во време на многу затегнати односи со САД.
„Кина е подготвена да соработува со Русија за да ги преземе одговорностите на големите сили, да игра водечка улога и да внесе стабилност и позитивна енергија во хаотичен свет“, рече Си на почетокот на состанокот што се емитуваше во живо.
Според кинеската државна телевизија, Си му рекол на Путин дека Кина е подготвена „да работи со Русија за цврста и взаемна поддршка за прашања поврзани со основните интереси на двете и да ја продлабочи соработката“.
Путин, од своја страна, ги осудил обидите на Западот да „создаде униполарен свет“, кои „неодамна добија апсолутно грда форма и се целосно неприфатливи“.
Нивната претходна средба датира од февруари минатата година, кога рускиот претседател отиде на Зимските олимписки игри во Пекинг. Тие потоа го прогласија своето пријателство „без граници“. Неколку дена подоцна започна инвазијата на Украина.
Пекинг ниту ја поддржа ниту јавно ја критикуваше руската инвазија, но постојано изрази поддршка за Москва во услови на западни санкции.
Планирано е Кси да се сретне и со белорускиот претседател Александар Лукашенко, главниот сојузник на Русија.
Пред средбата со кинескиот претседател Путин разговараше со претседателите на Иран, Киргистан и Туркменистан.
Фото ТАСС