Денешните пропагандистички и панични реакции на нашиот помал партнер во Владата, ВМРО ДПМНЕ служат само за поттикнување на забуни и се во функција на нивната кампања на сеење страв преку лажни вести, велат од ДУИ како реакција на денешното соопштение од партијата на Христијан Мицкоски.
Според партијата од Мала Речица, Владата на Република Северна Македонија е легитимна, демократски избрана, стабилна, и е во сигурни раце, под раководство на Европско ориентирани партии. Додаваат дека земјата е во сигурни раце и на прав пат, кон полноправно членство во Европската Унија и во стратешко партерство со САД.
-Недржавничкото постапување во Собранието на опозоцијата докажа дека ВМРО ДПМНЕ не го почитува ниту граѓаните, ниту законите, ниту уставот, се вели во соопштението на ДУИ.
ВМРО-ДПМНЕ денеска обвинија дека „СДСМ дозволи уште едно понижување на македонскиот народ, само за да си ги спасат фотелјите и коруптивните зделки“.
-Талат Џафери е синоним за политичар и личност, кој е недостоен да биде на ова место. Човек кој е близок со криминалното подземје, каде често и се слика со нив, човек кој по потреба ги кршеше законите и Деловникот во Собранието, човек кој си ја вработи ќерката во ЕЛЕМ, а синот полагаше правосуден испит без диплома за завршен факултет, човек кој го блокираше и законот за бранителите, со читање на поезија од говорница, порачаа меѓу другото од партијата.
Досегашниот премиер Димитар Ковачевски му ја предаде функцијата на Џафери, претседател на техничката влада. На заминување додаде дека изминатите две години додека бил на функцијата не биле лесни и се пофали дека со владините мерки бил воспоставен систем кој функционира во време на криза. Џафери, пак, повтори дека преодната влада ќе биде транспарентна и ќе работи во служба на граѓаните.