Европската агенција за лекови (ЕМА) во понеделник ќе одлучи дали ќе ја одобри употребата на третата доза од вакцината на „Фајзер“ и најверојатно нема да даде јасни упатства за тоа кој треба да ја прими, според внатрешниот документ и изјавите на двајца службеници.
Доколку ЕМА ја одобри третата доза, 27-те земји-членки ќе им се придружат на САД, Обединетото Кралство и Израел, на кои веќе им е дадено зелено светло за примена на т.н. засилувачки дози, иако се уште нема консензус меѓу научниците за тоа дали е потребно.
„ЕМА ќе даде мислење на 4 октомври за потребата од трета доза на вакцината на Фајзер за општата популација“, рече извршниот директор на ЕМА, Емер Кук, на внатрешниот состанок со европските пратеници во вторникот, според документите објавени од Ројтерс.
Повеќе од десет земји на ЕУ веќе започнаа со вакцинација со третата доза, без официјална поддршка од европското регулаторно тело.
Официјалното одобрување ќе обезбеди правна заштита за овие земји, а другите може да се охрабрат да се вакцинираат со трета доза за борба против позаразната делта верзија на коронавирусот во зимските месеци.
Двајца официјални претставници на ЕУ добро упатени во процесот на донесување одлуки на ЕМА рекоа дека одлуката следната недела ќе се фокусира на безбедноста и ефективноста на засилувачите и ќе биде општа, што значи дека тие нема да препишат точно која возраст или ризични групи треба да ја примат.
Европската комисија постојано предупредува дека различните национални политики за вакцини може да ја зголемат неодлучноста кај луѓето.