Турскиот претседател Реџеп Таип Ердоган во саботата изјави дека Турција ги поддржува „угнетените“ на Кавказ, каде Анкара го поддржува Азербејџан во жестоките судири против ерменските сили во Нагорно Карабах.
„Ние стоиме покрај угнетените насекаде, од Сирија до Либија, од источен Медитеран до Кавказ“, рече тој, додавајќи дека Турција се стреми дење и ноќе да го заземе заслуженото место во глобалниот светски поредок, пренесе Ројтерс.
Ердоган во Коња рече дека со спојување на кризните точки што се протегаат од Сирија, преку Медитеранот до Кавказ, се добива слика за обид за опсада на Турција, пренесува Анадолија.
Тој рече дека е јасно дека светот се наоѓа во пресвртна точка, во која Турција се обидува да се оддалечи од новиот глобален поредок, исто како што тоа и го направи век или половина век порано.
„Ако обрнете внимание, ќе видите дека најголемите кризи во светот се случуваат околу Турција. Поврзувајќи ги кризните точки, кои се протегаат од Сирија, преку Средоземното море, до Кавказ, добивате слика за обиди за опсада на Турција. Такви игри сме виделе и претходно. Од една страна го браневме интегритетот на државата и единството на луѓето, а од друга страна правевме чекори за сузбивање на обидот за опсада на Турција“, рече Ердоган.
Тој исто така рече дека Турција му го покажа на светот својот решителен став и посветената работа на која мора да се смета во идните реформи на светскиот систем.
Коментирајќи ја ситуацијата во регионот, тој рече дека нема да дозволи никаква безбедносна закана за Турција и дека во тој контекст која било област може да биде сцена на воена операција доколку има закана.
За состојбата на истокот на Медитеранот, тој посочи дека Турција, под празни закани и уцени, не се предаде во борбата за легитимни права во тој регион, и дека тие, од друга страна, се принудени да го слушаат повикот на Турција за дијалог.