Регулаторот на Европската унија внимателно ќе ја проучи руската вакцина против ковид „Спутник V“ за компликации во форма на тромбоза, но засега нема информации за компликации, изјави извршниот директор на Европската агенција за лекови (ЕМА) Емер Кук на прес-конференција.
„Да, се разбира, ќе посветиме големо внимание на ова прашање за време на прегледот на досието „Спутник V“. Досега немаше такви информации во контекст на податоците што досега успеавме да ги разгледаме“, рече таа.
Кук објасни дека проценката на руската вакцина од страна на европскиот регулатор е сè уште во рана фаза и дека сè уште не е достигната проценка на ризикот.
„Би сакала да потенцирам дека проценката на вакцината „Спутник V“ е сè уште во рана фаза. Фазата на проценка од страна на комитетот за фармаковигиланса сè уште не е започната“, потенцира таа.
Вакцината „Спутник V“, произведена од Институтот за научно истражување „Гамалеј“ во соработка со рускиот фонд за директни инвестиции, на 11 август доби потврда за регистрација од руското Министерство за здравство, со што стана првата регистрирана вакцина против коронавирусот во светот.
Европската агенција за лекови (ЕМА) започна со тестирање на руската вакцина на 4 март. Извор запознат со процесот рече дека одлуката за конечно одобрување може да биде донесена во мај.
Претходно беше објавено дека ЕМА, откако изврши проценка на ризик за тромбоза кај лица вакцинирани со вакцината „Џонсон и Џонсон“, утврди можна врска помеѓу вакцинацијата и екстремно ретките компликации кај вакцинираните лица.