Претседателката на Европската комисија, Урсула фон дер Лајен, изрази остри критики кон политиките на претседателот на САД, Доналд Трамп, во говорот што го одржа на Конгресот на Европската народна партија во Валенсија. Фон дер Лајен ја истакна опасноста од „непредвидливата тарифна политика“ на американската администрација, предупредувајќи дека таа ќе има сериозни последици не само за Европската Унија, туку и за целиот свет.
„Тарифите на САД се највисоки во последните сто години. Милиони граѓани ќе се соочат со повисоки цени на храната, лековите ќе бидат поскапи, транспортот ќе чини повеќе, а инфлацијата ќе се зголеми“, рече фон дер Лајен, истакнувајќи дека овие мерки ќе доведат до економски потешкотии за многумина.
Иако не го спомена конкретно претседателот Трамп, Фон дер Лајен ги критикуваше авторитарните лидери ширум светот, во изјави кои лесно можат да се поврзат со агресивниот дипломатски стил на Трамп, но и со политиките на рускиот претседател Владимир Путин.
„Ние не ги напаѓаме нашите соседи и не ги казнуваме“, додаде таа.
Во продолжение на говорот, Фон дер Лајен ја истакна европската посветеност на академската слобода, потврдувајќи дека контроверзните дебати на европските универзитети се добредојдени. Ова доаѓа како контекст на кампањата на Трамп против некои од најпрестижните американски универзитети.
Европската унија започна координирана кампања за привлекување американски студенти и академици, позиционирајќи се како засолниште за научници кои бегаат од репресивните мерки на Трамп. „Сметаме дека слободата на науката и истражувањето е фундаментална и сакаме научниците и истражувачите од целиот свет да ја изберат Европа како свој дом и повторно да ја направат Европа дом на иновациите“, заклучи фон дер Лајен.