(ФОТО) „Кокино-Тврдина на Сонцето“: фестивалско соблазнување за сите сетила

Првото издание на мултимедијалниот фестивал „Кокино-Тврдина на сонцето“, лоциран во мегалитската опсерваторија, е редок пример за културен хепенинг во Македонија, кој ги надмина очекувањата на публиката.

Од 17 часот попладне вчера, на фантастичната локација со одлично обмислена организација, беше овозможена целодневна гозба за сите сетила, која ги задоволи и оние со најизострени рецептори за нови вкусови.

Ограничениот број на посетители, што предизвика незадоволство кај оние кои задоцнија со снабдувањето на билети за превоз или паркинг, сепак се испостави како соодветно решение кое го загарантира целосното уживање во сите елементи на програмата, како и обезбедување на интимна врска со природата и уметноста истовремено.

Љубопитните можеа да бидат дел од едукативни тури до опсерваторијата со водич, како и предавање од областа на астрономијата, а креативните да учествуваат во работилници за филигран, керамика, компостирање и оригами.

Перформативните активности на настанот започнаа со поетско читање, а музичката програма се отвори со изгревот на ѕвезденото небо.

Фантастичниот Мухамед Ибраими со својата гитара приреди неповторливо доживување за посетителите кои го добија камерниот шарм среде природа, со блескавото Кокино над нивните глави.

Битолските легенди „Фолтин“ со внимателно одбрана листа на нумери, ја дигнаа публиката на нозе и неуморно го извадија најдоброто од своите грла и прсти.

За крај на музичкиот дел, култниот Кирил Џајковски со својата, повторно адекватно избрана придружба и сервирана музичка селекција, звучеше артистично како што одамна не сме го слушнале во живо, потсетувајќи на својата маестралност во спојување на електронското и нашето скапоцено „изворно“.

Програмата беше заокружена со избор на краткометражни филмски продукции за опуштено затворање на целодневната дружба.

“Кокино-Тврдина на сонцето“ дефинитивно заслужува традиционално повторување, но ако, и само ако, го задржи овој свој неверојатен автентичен драж.

Влезот на настанот беше бесплатен, а организатор на фестивалот е Пасворд продукција.

Ф.А.